سیاسي لېکنې

امريکايي اشغال د فساد مرجع ده

ابو ياسر افغان
 
د امريکايانو له اشغال وروسته د عراق څخه د زرګونو میلیاردو ډالرو مفت تیل امريکا او اسرائیلو ته صادر شوي، بالعکس امریکا عراق ته فقط تر ۴۰۰ میلیاردو ډالرو مرسته ورکړې هغه هم د ملا ماتوونکو شرطونو سره مله او د یو یو ډالر حساب یې ترې بیرته اخیستی. په دې مانا چې امریکا د عراق تیل مفت وړي د دې په بدل کې یې عراق ته معمولي اندازه مرسته ورکړې خو هغه هم یا پور ده یا پیغور، او د عراق اوسنی حالت هم داسې دی چې نږدې ټول عراق وران ویجاړ، د قومي، سمتي، مذهبي او ژبنيزو جګړو ځاله ده، د امریکا او اسرائیلو استخبارات ترې د یو مهم ټرینینګ مرکز او قرارګاه په توګه کار اخلي، همدا اوس د عراق ګوډاګی رژیم د خپلو تیلو واک نه لري او د امريکا په مرسته مړ ژواندی حالت لري، د عراق پوځیان د امريکا د احسانونو لاندې او امریکا ته په خدمت کولو د امريکا څخه په امر اخيستلو او د امريکا د ګټو په ساتلو ورته قسم ورکړل شوی دی!!
همدا حالت دلته په افغانستان کې هم دی، د افغانستان د زرګونو میلیاردو ډالرو په ارزښت کانونه امريکایانو چور کړي او لا لګیا دي چور کوي یې، د امریکا لپاره افغانستان ستراتيژيک اهمیت لري او دلته موجودیت یې د خپلو ګټو د ساتنې په پار دی، خو د دې خطر له ډاره چې افغان مؤمن ملت اشغال نه مني، امريکا د خپلې مکرجنې پالیسۍ په اساس دلته یو ګوډاګی رژيم رامنځته کړی، دغه رژیم چې په تمامه معنی د امریکا خدمت کوونکی او چوپړ ګر دی، د امریکا په هغو پيسو پايي کومې پیسې چې امریکا یې افغانستان ته د پور او یا احسان په ډول ورکوي، خو بیرته دا شرط ورسره لګوي چې د کابل ګوډاګی رژیم به د امريکا هر خدمت ته لاس په نامه ولاړ وي، د امريکا پوځیان او مامورین به په افغانستان کې د هر ډول قضایي او عدلي تعقیب څخه مصؤن وي، امریکایان به د افغانستان له کانونو، جغرافیا او امکاناتو څخه د خپلو ګټو د ساتنې لپاره څرنګه چې یې خوښه وي کار اخلي، خو د کابل رژیم به نه دا چې کوم اعتراض نه کوي بلکې د دې تر څنګ به د امريکا ناچیزه مرستې افغان ولس ته د امريکا د لوی احسان په ډول ور یادوي او له ولس نه به غواړي چې د امريکا د دغه احسان بدل موږ نه شو ورکولای نو باید د امریکا د موجودیت مخالفت هم و نه کړو، د لکونو ملکیانو د وژلو نه علاوه امريکا دلته د فکري او کلتوري یرغل لړۍ هم توده ساتلې، همدا اوس په لسګونو تلويزيوني، راديويي، چاپي او ټولنيزي رسنۍ، مؤسسات او ټولنې د امریکا اشغال لپاره چوپړ ګري کوي، فحاشي خپروي، بې دينۍ ته کمپاین کوي، د ډيموکراسۍ اهداف پلي کوي او د افغانانو ذهن سازي کوي تر څو د اشغالګرو صلیببانو خلاف کوم غبرګون و نه ښایي، د دوی دنده دا ده چې امريکايي اشغالګر د سولې او پرمختګ راوړونکي، د ملګرو ملتونو عسکر، د افغانستان ساتونکي، محسنین، د افغانانو مخلصین او خواخوږي، د افغانستان د دښمنانو دښمنان او په ټوله مانا د افغانانو لپاره د دوی موجودیت د یو اساسي، ضروري او بنسټیز ضرورت په توګه تعبیر کړي، بالمقابل د اشغالګرو صلیبیانو مخالفین د حق لارې مجاهدین د تروریستانو، شر اچوونکو، باغیانو، پردیو جاسوسانو او… په نومونو یاد کړي تر څو په دې ډول امریکایان دلته د ملي مقاومت له خطره بچ پاتې شي او افغان ولس یې پرضد سرتاسري پاڅون و نه کړي. دا یوه لویه پروسه ده، امريکا دلته د دايمي استوګنې په موخه راغلې او خپله جګړه یې په ډېر مهارت د اسلام په خلاف روانه کړې ده.
افغانستان سره د امريکا مرستې د هغو زرګونو میلیاردو ډالرو شلمه برخه هم نه جوړوي کوم ډالر چې امریکا یې د افغانستان له زېرمو تر لاسه کوي، امريکا هم دلته د اسلام خلاف جګړه کوي او هم د افغانستان د کانونو لوټ تالان ته ادامه ورکوي، په ټوله کې دا خبره په یقین سره کولای شو چې امریکا دلته د شر او فساد اصلي مرجع ده، تر څو چې امریکایان دلته حضور لري نو دلته به د شر او بدبختيو دا لړۍ دوام لري، د امریکایانو موجودیت او اشغال د افغانستان په شمول ټولې سیمې ته یو لوی خطر دی.
 
د افغان مجاهد ولس د یو سر تاسري جهادي پاڅون په هیله


زموږ په ویب پاڼه کې هره خپریدونکې لیکنه د لیکوال خپل نظر او تحلیل ده د ادارې توافق ورسره شرط نده
دا هم ولولئ  ولس داسلامي امارت غږ ته درناوی وکړ !

دا هم ولولئ

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close