سیاسي لېکنې

د غني فرمان: سیداباد ونړوئ چې نیویارک امن شي!

زخمي افغان

زموږ تاریخ لکه څنګه چې اسمانڅکي اتلان لري همداسې د سرټیټو ګوډاګیانو او مړتتانو څو بیلګې هم لري. د ګوډاګیانو یوه پیژندل شوې څیره شاشجاع دی، شاشجاع چې افغانستان ته د انګریزانو په راوستلو ملامت او د تاریخ مجرم پیژندل شوی، ګناه یې دا وه چې په ۱۸۳۹ م کال کې د انګریزي لښکر په بدرګه پر افغانستان راغی او د کابل تخت یې قبضه کړ.

شاشجاع به ګوډاګی و، د کفارو ملګری به و او بل هر الزام پرې لګولای شو، اما دومره بې غیرته، بې نسبه او بې اصالته نه و چې د لندن د انګریزي ماڼیو د خوندیتوب لپاره د خپلو بې چاره هیوادوالو خټینې کوډلې له خاورو سره خاورې  او د ودانو کلیو د قصدي تخریب قومنده صادره کړي.

دې وطن ببرک کارمل هم درلود، خو کله یې هم دا نه و ویلي چې افغانستان وران کړئ تر څو ماسکو او لنین ګراد په امن شي. اما راشئ د نن زمانې امریکایي ګوډاګي اشرف غني ته چې د خپلو صلیبي بادارانو د کفري عقدې د سړولو لپاره پر افغان اولس د قسما قسم مظالمو سرچپه میچنې چلوي.

څه موده وړاندې اریانا تیلویزیون او ګڼو نورو رسنیو راپور ورکړ، چې د اشرف غني تر مشرۍ لاندې ګوډاګیانو د میدان وردګ ولایت په سید اباد ولسوالۍ کې د عمومي سرک له غاړې سره  د افغان اولس ۸۰ کورونه نړولي دي. د دې کورونو خلک وایي چې له هیڅ وسلوالې ډلې سره تړاو نه لري، عام افغانان دي او د کورونو یوازینۍ ګناه یې دا وه چې عمومي سرک ته نږدې ول. دوی وایي همدا کورونه یې د ټول ژوند سرمایه وه، د مني په دې ساړه موسم کې چې په میدان وردګ او نورو مرکزي سیمو کې هوا ډیره سړه ده، د دومره ډیرو خلکو بې کوري یوه بله بشري فاجعه ده. ځکه دا خلک نه دومره وس لري چې ځان ته نور کورونه جوړي او نه یې هم څوک په غم او کیسه کي دي. ځکه د دوی کورونه د کابل د حکومت لخوا د طالبانو د پلوی په جرم په نړول شوي دي.

دا هم ولولئ  د لاسپوڅو ۱۸ کلنې لاسته وروړنې څه دي……؟

په سید اباد او نورو سیمو کې د بېچاره افغانانو کورونه او ملکیتونه د هغو ځانګړو ځواکونو لخوا نړول کیږي چې شپني عملیات ترسره کوي. اشرف غني چې کله ددې قاتلو ځواکونو په قرارګاه کې د خطابې میز ته پورته شي نو تر خبرې وړاندې او وروسته همدا ټکی تکراروي چې ( ستاسو قرباني او عملیات د دې لپاره دي چې نیویارک امن شي. دا ستاسو د عملیاتو برکت دی چې په واشنګټن او لاس انجلس کې چاودنې نه کیږي)

که د تروریستانو تر عنوان لاندې د بې ګناه افغانانو قتل عام د نیو یارک د امن لپاره وي نو پوښتنه دا ده چې د سید اباد خټینو کورونو څه ګناه کړې وه؟؟ دغه غریبانه جونګړې خو د ځمکې د کُرې په بل اړخ پرتې دي،له نیویارک څخه لسګونه زره کیلومتره لرې دي، نه پوهیږو د دغو جونګړو د نیویارک له ماڼیو سره څه مناسبت و چې دغسې د اشرفي قاتلانو لخوا په بمونو تخریب او لوټه لوټه شوې؟؟

خو دا یوازې د وردګو سیداباد نه دی چې خټینې کوډلې یې د اشرف غني په امر د نیویارک او لاس انجلس له ماڼیو ځاریږي. په پکتیا، لوګر، غزني، بغلان او ډیرو نورو ولایاتو کې کټ مټ همدا عملیه روانه ده. د اشرف غني قاتلان هره شپه په ولسي سیمو چاپې اچوي. د خلکو کورونه نړوي، د ځوانانو تر سرونو بارود رسۍ ورتړي او د داعش په شان یې سر له تنې بیلوي، سپین ږیري قتلوي، ښځې او ماشومان د خوب په بسترو کې وژني او . . .  مګر د څه لپاره ؟؟؟ ځواب معلوم دی. . .  د دې لپاره چې د ټامي بابا د خرمستیو وطن او د ده د نازولو اولادونو د هوسبازۍ ټاټوبی (نیویارک او لاس انجلس) په امن شي.

دا هم ولولئ  امریکایان د بل لاسپوسي نظام په فکر، خو طالبان د دایمی سولي او هر اړخیز سیاسی شرعی نظام په لټه کې!

هو کې، همدا د اشرف غني د تفکر او ستراتيژۍ ټوله خلاصه ده. نوموړي چې ځان یې د نړۍ دوهم متفکر باله، دې ولس ته یې له بې کارۍ، قتلونو، غلا، لوټمارۍ، بدنامۍ او فحاشۍ وروسته  آخرین ارمغان همدا و چې ( سیدا باد ونړوئ تر څو نیویارک امن شي)

د افغانستان لپاره د اشرف غني د لرلید خلاصه همدا ده چې سیداباد ونړوئ، زرمت بمبار کړئ، شیرزاد په وینو ولمبوئ، لوګر په اور وسوځئ، شلګر او دهیک له خاورو سره برابر کړئ، تر څو نیویارک په امن شي او په لاس انجلس کې چاودنه ونه شي.

تاریخ به ډیر سرټیټي او ګوډاګیان لیدلي وي خو په دې کچه د خپل اولس غدار او د ملت جفاکار یې ښایي په تصور کې هم نه وي راغلی.



زموږ په ویب پاڼه کې هره خپریدونکې لیکنه د لیکوال خپل نظر او تحلیل ده د ادارې توافق ورسره شرط نده

دا هم وګورئ

Close
Close