سیاسي لېکنې

نوی کال او نوې هیلې !

شاهد (غزنیوال):

نوی ۱۳۹۸ کال په داسې حال پر افغانانو راځي چې د جګړو ، بمونو او وحشتونو په لمبو کې هغوی د سولې او امن سیوري ته هم هیله مندي لري.

که له یوې خوا مریکايي اشغالګر او د هغوی اردلیان پر مظلومو افغانانو بمونه او توپونه اوروي ، خو له بلې خوا بیا همدا افغانان د بین الافغاني تفاهم په پلمه په لویوغونډو او جرګو کې سره راټولیږي ، د خپل هیواد د راتلونکي په اړه غږیږی ، تبادل نظر کوي او داسې ټکیو ته سره نیږدي کیږي چې وکړای شي له مخې یې د هیواد روان څلویښت کلن ناورین ته ورکې د پای ټکی کیښودل شي.

اشغالګرو امریکایانو چې ۱۹ کاله وړاندې یې زمونږ د هیواد پر حریم یرغل وکړ او دلته یې د نړۍ له ګوټ ګوټ نه مغروره جګړه مارې لښکرې راوستلې نن یې الحمد لله د افغان مجاهد ولس د جهادي مقاومت له امله هماغه ټول کفري غرور تر پښو لاندې شوی او په ټیټو سترګو د مجاهدینو مشروعو غوښتنو منلو ته اړیستل شوي دي.

د افغان مجاهد ولس د ځپلو او محکومولو لپاره د امریکايي اشغالګرو ټول پوځي ، تخنیکي او استخباراتي ځواک اوبه شوی او ټولې شیطاني دسیسې یې شنډې شوې دي.

دا هم ولولئ  اشرف غني په کوم مخ استقلال لمانځي؟

اوس هغوی ته هیڅ داسې وسیله نه ده ورپاتي چې خپل هدف ته د رسیدو په لاره کې دوی ته موثریت ولري.

په افغانستان کې په خپلو فاسدو مزدورانو دومره بي اعتماده شوي چې نور نه دوي خپله د مجاهدینو په وړاندې د مقاومت تاب لري او نه یې هم اجرتي مزدوران له مجاهدینو سره د جنګیدلو روحیه .

فاسدو مزدورانو یې هم خپل منځي وحدت له لاسه ورکړی او هریو د بل په خلاف په توطیو او سازشونه جوړولو لګیادی.

د دې ترڅنګ د مجاهدینو صف ورځ تربلې محکم او مضبوط  او د مقاومت په سنګرونو کې یې پوځي وړتیا او جهادي روحیه مخ په لوړیدو ده.

سره له دې چې لا هم امریکايي اشغالګر او د هغوی ایتلافي انډیوالان ( ناټو ځواکونه ) له خپلو ټولو پرمختللیو وسائلو سره په افغانستان کې میشت دي ، خو له هغه سره سره د هیواد تر نیمايي زیاته برخه د مجاهدینو تر کنټرول لاندې ده.

مجاهدین له پراخ ولسي حمایت څخه برخمن او د هیواد په مفتوحه سیمو کې ټولې اداري چاري د ولس په ملتیا پرمخ وړي.

دا هم ولولئ  داسي وحشت چې پوله نه لري

د ولسي حمایت ترڅنګ نړیوال هم دیته تیار شوي چې د جهاي مقاومت له برحقې داعيي نه ملاتړ وکړي ، هغه په رسمیت وپيژني او د دیپلوماتیکو چاینلونو له لارې له هغوی سره  سیاسي اړیکې ټینګې کړي ‎.

په مسکو کې د افغانستان په اړه په رابلل شوي کانفرانس کې د اسلامي امارت د سیاسي استازیو رسمي ګډون، او دوهم ځل د مسکو په بین الافغاني غونډه کې د اسلامي امارت فعاله برخه ، د ازبکستان ، ایران او نورو ګاونډیو هیوادونو لخوا د اسلامي امارت سیاسي استازیو ته رسمي بلنې او له هغوی سره ملاقاتونه ټول زمونږ د ادعاء ښکاره بیلګې دي.

پورتني واقعیتونه هغه څه دي چې مونږ ته په نوي کال کې د نویو ښوهیلو هیله مندي را کوي.

لوی خدای دې نوی ۱۳۹۸هجري لمریزکال د افغان جګړه ځپلي ولس لپاره د سولې ، سوکالۍ او امن کال وګرځوي.

الله تعالی دې نور ځوریدلي افغانان په خپل هیواد کې د اسلامي حاکمیت تر سوري لاندې د هوسا، بسیا او نیکمرغه ژوند څښتنان کړي.

اللهم آمین



زموږ په ویب پاڼه کې هره خپریدونکې لیکنه د لیکوال خپل نظر او تحلیل ده د ادارې توافق ورسره شرط نده

دا هم وګورئ

Close
Close